२४ असाेज, काठमाडौं : राष्ट्रिय मानव अधिकार आयोगले पहुँचयोग्य उपचार र मानसिक स्वास्थ्यसम्बन्धी सचेतना कार्यक्रम सञ्चालन गर्न माग गरेको छ । मानसिक रोगीले सम्मानजनक जीवनयापन गर्न सरकार र सम्बन्धित क्षेत्रको ध्यानाकर्षण गराएको छ ।
आयोगका प्रवक्ता डा टिकाराम पोखरेलले ३१औँ विश्व मानसिक स्वास्थ्य दिवसका अवसरमा जारी गरेको विज्ञप्तिमा मुलुकमा मानसिक स्वास्थ्यको चिन्ताजनक अवस्था र त्यसलाई सम्बोधन गर्न पर्याप्त काम हुन नसकेको औंल्याएको छ ।
‘सरकारले पर्याप्त बजेट विनियोजन र मानसिक स्वास्थ्यका लागि संयन्त्र नबनाएको देखिन्छ ।स्वास्थ्य तथा जनसङ्ख्या मन्त्रालयका अनुसार १४४ मनोचिकित्सक र तीन बाल मनोचिकित्सक छन् ।
मनोसामाजिक सहयोगका लागि अन्य मानव संसाधन (मनोरोग नर्स, मनोवैज्ञानिक र सामाजिक कार्यकर्ता) को व्यवस्थापन छैन,” विज्ञप्तिमा भनिएको छ।
विश्व स्वास्थ्य संगठनका अनुसार विश्वको कुल जनसङ्ख्याको १५ प्रतिशत मानसिक रोगबाट पीडित छन्। डब्ल्यूएचओको तथ्याङ्क अनुसार पाँच मानसिक रोगीमध्ये चार न्यून र मध्यम आय भएका व्यक्तिहरू भेटिएका छन्।
नेपालमा मानसिक स्वास्थ्यबारे चेतनाको अभावमा मानसिक रोगीलाई टाँस्ने र थुनेर राख्ने जस्ता बेवास्ता गर्ने गरेको आयोगले जनाएको छ । आज नेपालसहित विश्वभर विश्व मानसिक स्वास्थ्य दिवस–२०२३ मनाइँदै छ । ‘मानसिक स्वास्थ्य सर्वव्यापी मानव अधिकार’ भन्ने नाराका साथ दिवस मनाइएको छ ।
