२६ साउन , काठमाडौं : ब्यूरोका एक अधिकृतका अनुसार केन्द्रीय अनुसन्धान ब्यूरो (सीआईबी) ले एक क्वीन्टल सुन तस्करी प्रकरणमा थप दुई जना चिनियाँ नागरिक ली जिएलिन र लुई फुयानलाई अन्तर्राष्ट्रिय विमानस्थलबाट पक्राउ गरेको छ ।
अध्यागमन विभागले सीआईबीका अधिकृतहरुलाई कालोसूचीमा रहेका उनीहरु विमानस्थल पुगेपछि जानकारी गराएको थियो भने विभागबाट बुझेर उनीहरुलाई पक्राउ पूर्जी थमाइएको एक अधिकृतले बताए ।
ठमेलस्थित होटल भियनामा छापा मर्दा १४ साउनमा पक्राउ परेका बेल्जियन नागरिक दावा लामाले दुई चिनियाँ नागरिकलाई होटलको नाममा लिएको गाडी उपलब्ध गराएको पाइएको र ती गाडी पक्राउ भएको स्रोतले जनाएको छ ।
३ साउनमा हङकङबाट आएको सुनसहितको १५५ किलो ‘ब्रेक शु’ पनि बरामद भएको राजश्व अनुसन्धान विभागले जनाए लगत्तै ट्याक्सी चालक र भन्सार एजेन्ट पक्राउ परेका थिए ।
