पौष २१ काठमाडौं, सरकारले राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीलाई बर्खास्त गरेको छ । ज्ञवालीको काम सन्तोषजनक नभएको भन्दै सरकारले हालै स्पष्टीकरण सोधेको थियो । उनले बुधबार १२ पन्ने स्पष्टीकरण बुझाएका थिए । तर, उनले आफू ५ वर्षका लागि नियुक्त भएको भन्दै स्पष्टीकरण सोध्न आधार नै नभएको दाबी गरेका छन् ।
बिहीबार बिहान बसेको मन्त्रिपरिषद बैठकले ज्ञवालीको स्पष्टीकरण चित्त बुझ्दो नभएको भन्दै बर्खास्त गर्ने निर्णय गरेको छ । अर्को सीईओ आजै नियुक्त गर्ने र दुबै निर्णयलाई एकसाथ सार्बजनिक गर्ने समझदारी भएको मन्त्रिपरिषद स्रोतले बताएको छ ।
बैठकमा प्रधानमन्त्री प्रचण्डले प्राधिकरणका सीईओले काम गर्न नसकेको घाम झै छर्लङ्ग रहेको बताए । साथै उनले आजै नयाँ सीईओ नियुक्त हुने जानकारी दिए । तर, कसलाई नियुक्त गर्ने भन्ने खुलाएनन् ।
सरकारले स्पष्टीकरण सोधे लगत्तै प्राधिकरणका सीईओ ज्ञवालीले भने प्रमुख विपक्षी एमालेको समर्थन लिएका थिए र,आफूलाई हटाए अदालत जाने धम्की दिँदै आएका छन् ।
