काठमाडौ २७ चैत, हाम्रा नेताहरु भारत परास्त भईरहेको आरोप लागि रहेको बेला प्रधानमन्त्री पुष्पकमल दाहाल ‘प्रचण्ड’ले भारतीय नेतालाई आफ्नो ‘पावर’ देखाएका छन् ।
बालुवाटार स्रोतका अनुसार भारतका प्रधानमन्त्री नरेन्द्र मोदीका ‘दूत’ एवं भारतीय जनता पार्टीका वरिष्ठ नेता भगतसिंह कोस्यारी प्रधानमन्त्री प्रचण्डलाई भेट्न विहानै सरकारी निवास बालुवाटार पुगेका थिए । बाहिर सचिवालयमा बसिरहेका प्रचण्डपुत्र प्रकाश दाहालले कोस्यारीलाई रोकेर प्रक्रिया पुर्याई आउ भन्दै फिर्ता पठाइदिए ।
भारतीय जनता पार्टीका वरिष्ठ नेता कोस्यारी, नेपाल भारत प्रबुद्ध समूहको तेस्रो बैठकमा भाग लिन काठमाडौं आएका थिए । स्वदेश फर्किने बेला प्रधानमन्त्रीसँग भेट गरेर जाने मनसायले सिधै बालुवाटार पुगे । प्रमको सचिवालयमा बसिरहेका प्रचण्डपुत्र प्रकाशले ‘तपाईहरुले अहिले भेट्न सक्नुहुन्न्, प्रधानमन्त्रीसँग भेट्न भारतीय राजदूतावासमार्फत समय लिएर राजदूतसँगै आउनुस् वा परराष्ट्र मन्त्रालयमार्फत आउनुस्’ भन्दै कोस्यारी नेतृत्वको भारतीय टोलीलाई फिर्ता पठाए ।
आफ्नो दलबलसहित प्रधानमन्त्री भेट्न बालुवाटार पुगेका कोस्यारीलाई ‘अपमानित’ हुनेगरी प्रचण्डले छोरामार्फत फिर्ता पठाएर आफ्नो ‘पावर’ देखाएको छ ।
