१५ असोज, काठमाडौँ : नेपाल वायुसेवा निगम (नेपाल एयरलाइन्स) सुधार सिफारिस समितिले राष्ट्रिय ध्वजावाहकलाई थप प्रतिस्पर्धी बनाउन थप पुँजी लगानी गर्नुपर्ने सुझाव दिएको छ ।
नेपाल राष्ट्र बैंकका पूर्वगभर्नर दीपेन्द्रबहादुर क्षेत्रीको संयोजकत्वमा रहेको समितिले आइतबार संस्कृति, पर्यटन तथा नागरिक उड्डयनमन्त्री सुदन किरातीलाई प्रतिवेदन बुझाएको हो भने निगमको उचाइमा थप पुँजी लगानी गर्नुपर्ने बताएको छ । क्षेत्री नेतृत्वको पाँच सदस्यीय समितिमा सिए पियुस आनन्द, क्याप्टेन ओम गुरुङ, टीकाराम राई र सहारा न्यौपाने सदस्य थिए ।
“विशेष परिस्थितिमा खाँचो परेका अन्तर्राष्ट्रिय वायुसेवा कम्पनीहरूलाई सम्बन्धित सरकारले पुँजी उपलब्ध गराएको प्रमाण छ। यो तथ्यलाई मध्यनजर गर्दै सरकारले सरकारी स्वामित्वको वायुसेवा कम्पनीलाई अन्य प्रतिस्पर्धीका बीचमा थप पुँजी लगानी गरेर प्रतिस्पर्धी अवस्थामा लैजानुपर्छ,’ प्रतिवेदनमा भनिएको छ । हाल निगम आर्थिक वर्ष २०२२/२३ सम्म ४ अर्ब ९० करोड रुपैयाँ ऋणात्मक नेटवर्थसहित गम्भीर संकटबाट गुज्रिरहेको छ ।
निगमको कुल कर्जा ४८ अर्ब ३ करोड रुपैयाँ रहेको छ । प्रतिवेदनमा निगमले सहुलियतपूर्ण ऋण प्राप्त गर्ने र कर्जा न्यूनीकरणका लागि व्यवसाय बढाउने उपाय खोज्नुपर्ने औंल्याएको छ । त्यसैगरी समितिले निगमको प्रमुख कार्यकारीमा राष्ट्रिय योजना आयोगका उपाध्यक्षको नेतृत्वमा रहेको समितिबाट खुला प्रतिस्पर्धाबाट नियुक्ति गर्न सिफारिस गरेको छ । त्यस्तै, व्यवस्थापन सम्झौतामा पनि आधुनिक व्यवस्थापन प्रणाली अंगाल्न सुझाव दिइएको छ । साथै, समितिले रणनीतिक साझेदारलाई स्वागत गर्दै निगम मोडलमा निगम सञ्चालन गर्न सिफारिस गरेको छ ।
