२० भदौ काठमाडौँ : दक्षिण कोरियाको बुसानमा अक्टोबर ४ देखि १३ अक्टोबरसम्म हुने प्रतिष्ठित बुसान अन्तर्राष्ट्रिय फिल्म फेस्टिभलका लागि नविन सुब्बाले निर्देशन गरेको ‘गाउँ आइको बाटो : अ रोड टु भिलेज छनोट भएको छ ।
फिल्मलाई आफ्नो वेबसाइटमा विन्डो अफ एसिया श्रेणीमा छनोट गरिएको छ । बिहीबार क्यानडाको टोरन्टो इन्टरनेशनल फिल्म फेस्टिभलमा फिल्मको प्रिमियर हुँदैछ । निर्माता आमोद राईले बुसानमा छनोट हुन पाउनु गौरवको कुरा बताउँदै अन्तर्राष्ट्रिय मञ्चमा नेपाली कथाको लागि महत्वपूर्ण कोसेढुङ्गा भएको बताए । तर, बुसानले फिल्मको प्रदर्शन मिति भने उल्लेख गरेका छैनन् । यद्यपी निर्माता राईले फिल्मको एसियन प्रिमियर महोत्सवमा हुने बताए ।
कोरियामा हुने महोत्सवमा सबै कलाकार, निर्माता र निर्देशकको उपस्थिति रहने उनले बताए । गाउँमा सडक बनेपछि बाबु–छोराको सम्बन्धमा आउने चुनौती र परिवर्तनको वरिपरि चलचित्र घुम्छ । कथा साम्प्रदायिक लगानीको विचारमा केन्द्रित छ र दयाहाङ राई र पशुपति राईजस्ता प्रमुख कलाकारहरू छन्। चलचित्रको छायांकन भोजपुर, संखुवासभा र धरान जिल्लामा गरिएको छ ।
