१० असोज, काठमाडौँ : कोशी प्रदेशमा असार मसान्तदेखि डेंगुका कारण १७ जनाको मृत्यु भएको छ ।
सरकारी दिनमा सोही अवधिमा ३० हजार ३३० जना संक्रमित भएका छन् । सुनसरी जिल्लामा सबैभन्दा बढी डेङ्गुका कारण १३ जनाको मृत्यु भएको छ । जिल्लामा १९ हजार ४३२ सङ्क्रमित देखिएको कोशी प्रदेश स्वास्थ्य निर्देशनालय धनकुटाका जनस्वास्थ्य अधिकृत विवेक चाम्लागाईंले जानकारी दिनुभयो । कोशी प्रदेशका १४ वटै जिल्लामा डेंगुको संक्रमण देखिएको छ । चाम्लागाईंका अनुसार मोरङमा चार हजार २४२ जनामा डेङ्गुको संक्रमण देखिएको छ भने एक जनाको मृत्यु भएको छ ।
झापामा हालसम्म २ हजार ९६४ जनामा डेंगुको संक्रमण देखिएको छ भने दुई जनाको मृत्यु भएको छ । यसैगरी उदयपुरमा डेंगुको संक्रमणबाट एक जनाको मृत्यु भएको छ । डेंगु सङ्क्रमितको अहिले सुनसरीको बीपी कोइराला स्वास्थ्य विज्ञान प्रतिष्ठानका साथै विभिन्न जिल्लाका निजी तथा सरकारी अस्पतालमा उपचार भइरहेको छ ।
तेह्रथुम जिल्लामा हाल २ सय ११, पाँचथरमा ३३८, इलाममा ५ सय ३५, उदयपुरमा ८१६, धनकुटामा ४३२, भोजपुरमा ३३१, संखुवासभामा ८६७, ओखलढुङ्गामा ४०, ताप्लेजुङमा ३३, खोटाङमा ४५ र सोलुखुम्बुमा २ सय ९ जनामा संक्रमण देखिएको छ । डेङ्गुको प्रकोप बढ्दै गएपछि प्रदेशका सबै स्थानीय तहले डेंगुविरुद्धको अभियान थालेका छन् । यी प्रयासका बाबजुद पनि प्रदेशमा डेंगुको संक्रमण बढ्दै गएको छ ।
