काठमाडौं १२ बैशाख, कोमामा रहेकी, खोटाङ बाम्राङकी ३१ वर्षे देवी लामा श्रेष्ठको ८० दिनपछि होस् आएको छ। अस्टर अस्पताल युएईको मंखुलमा ८० दिन कोमामा बिताएपछि देवीको होस् आएको हो । उपचारमा संलग्न डाक्टरले देवीको स्वास्थ्यमा आएको सुधारलाई आश्चर्यजनक सुधारको रुपमा लिएका छन् । अस्पतालमा ल्याउँदा उनी बाँच्ने कमै आश रहेको अस्पताल स्रोतले बताएको छ ।
८० दिनसम्म सँगै अस्पतालमा बसेका श्रीमान् लोकेन्द्रले श्रीमतीको ज्यान गए आफूपनि श्रीमती संगै प्राण त्याग्ने बताएका थिए । देवी र लोकेन्द्र चेन कफिसपमा संगै काम गर्थे । कामकै शिलशिलामा भेट भएका लोकेन्द्र र देवीले गएको जुन महिनामा विवाह गरेका थिए ।
गएको जनवरीमा काम गरिरहेको बेला देवीलाई अचानक उच्च ज्वरो र वान्ता भयो । बिरामी हुँदा देवी ६ महिनाको गर्भवती थिइन् । देवीलाई श्रीमानले नै अस्पताल पुर्याएका थिए । अस्पताल पुर्याएको तीनदिन पछि विरामले झन साह्रो पारेपछि देवीलाई आइसियुमा भर्ना गरिएको थियो । उपचारमा संलग्न डाक्टरका अनुसार उनलाई स्वासप्रस्वास सम्बन्धी समस्या थियो । गर्ववती अवस्थामा यो कसै-कसैलाई हुन सक्छ । फोक्सो सुनिएर पानी भरिनुका साथै, मुटु पनि कमजोर भएको थियो । मृगौला र कलेजो पनि संक्रमित भएको कारण जिवीत रहने संभावना कम थियो ।
यसरि धेरै वटा अंगले एक साथ काम गर्न छाडेपछि देवीको अप्रेसन गरियो तर बच्चा बजाउन सकिएन । सामान्यतया यस्ता विरामीलाई १४ दिन मात्रै भ्यान्टिलेटरमा राखिने भएपनि देविलाई तीन महिना बढि राखियो । अहिले,गएको अप्रील ९ देखि उहाँको स्वास्थ्यमा सुधार भएकोले आइसियुबाट सामान्य रुममा लगिएको छ । मांसपेशी बलियो पार्नको लागि फिजियो थेरापी गराईरहेको छ । यो सकिएपछि देवी नेपाल फर्किनु हुनेछ । गएको सय दिनको उहाँलाई केहि याद छैन । मात्र एउटा सपना याद छ । रेलमा यात्रा गरिरहेको कुरा मात्रै याद भएको देवीले बताउनुभयो । उहाँको उपचारमा संलग्न डक्टरले देवीलाई पूर्णरुपमा स्वस्थ हुन अझै ६ महिना लाग्ने बताएका छन् ।
